黃國健開議辦請高永文有因

【明報專訊】新一屆立法會開始咗半年，唔少議員陸續喺地區開設辦事處，噚日民建聯陳克勤、公民黨郭家麒同工聯會黃國健都不約而同有辦事處開幕，其中黃國健就請到食物及衛生局長高永文、勞工處長卓永興、教育局常任秘書長謝凌潔貞等做主禮嘉賓。黃國健話，請高永文做嘉賓係有原因嘅，因為家九龍東嘅醫療服務唔足夠，黃大仙區無醫院，屬於觀塘區嘅聯合醫院難以負荷咁多病人，所以希望當局考慮喺啟德起一間全科醫院。


雖然特首梁振英日前出席活動時講明官員參加活動時，盡量唔接受禮物，以示廉潔、簡約；噚日黃國健向每個出席嘉賓送仙人掌，高永文等官員亦有收下，雖然仙人掌唔係貴重禮物，而人哋又送到，似乎要官員做到完全唔收禮，都有少少難度。