陳智思日食6餐減5磅

【明報專訊】行政會議成員陳智思（Bernard）喺政界出名體型fit爆，但Emily前幾日見到佢，發現佢又纖瘦咗少少。Bernard就好自豪咁講，近月減咗5磅，家156磅，因為佢試用咗新方法減肥，而呢個方法就係減少做運動，同埋一日食6餐！


Bernard一向好注重飲食，仲會大清早5點起身做gym，係運動健將一名，但有專家向佢教路，話做運動太長時間，反而會燃燒肌肉而唔係消脂，所以佢家改為做少啲，做半小時至45分鐘運動就收工。佢仲話，飲食都係關鍵，如果節食或一日只食一餐，反而會令大腦以為你唔夠飽，會吸收營養多啲，反而少食多餐，能加快新陳代謝，咁就反而無咁容易肥喎！


一日一餐適得其反

講起開餐，Emily見佢喺餐廳，無端端攞部手機出嚟影啲餸菜，以為佢做咗龍友或者學港女食到邊影到邊。Bernard就話，佢其實係做善事，因為侄女有份搞嘅非政府組織（NGO），叫做Table For Two「同營膳」，運作模式係同伙伴餐廳合作，餐廳菜牌會提供一啲健康菜式，如果顧客點選，便會自動捐助2元，款項會用嚟資助中國大陸或其他非洲國家，為有需要嘅兒童提供學校餐。


Bernard話，佢嗰日係刻意揀選參加嘅伙伴食肆，影低餸菜相片，然後上載向侄女「交功課」，證明支持善舉。