東方體育會蒐簽名反佔中

【明報專訊】愛港之聲噚日搞咗個政改論壇，吸引唔少支持中央嘅人同團體到場，場上雖然有泛民主派嘉賓，但台下好彩都只係止於口角鬧人，並無動武。另外，近排經常出席撐特首梁振英（CY）集會嘅東方體育會館主苗祺鈺，雖然噚日無到論壇，但就搵咗兩個會員代表發言，論壇後仲搵人簽名，反對佔領中環。
苗祺鈺除咗習武，仲係富士通香港總代理、新暉電腦主席，佢今年曾經喺維園年宵場外耍拳聲討「妖人」社民連。
館主託會員赴論壇批泛民
佢噚日搵咗個會員發言，話泛民行為激進，令香港社會動盪不安，經濟嚴重下滑，又話泛民受「外國勢力」支配，實在「亂港禍國」，怕中國統一，係極可惡嘅漢奸。發表完呢番話，會場當然掌聲四起啦。