李永達極速被點相

【明報專訊】規管一手賣樓條例噚日正式實施，樓書同價單都有新規範，令一眾發展商要重新「印書」。智庫組織「土地監察」主席李永達一向關注發展商點樣賣樓，佢同Emily透露，自己上星期諗住趁新例未實施前，「放蛇」去睇樓盤，順便拎番本舊樓書做比較。不過，阿達雖然係過氣議員，但人氣未泄晒，「放蛇」行動因為自己個樣太易認，最終都係失敗。


被當買家 全程跟實

今次畀阿達睇中嘅樓盤係新地旗下嘅「爾巒」。阿達話，上星期見得閒，諗住去睇吓家啲地產代理點賣樓，點知行行吓，突然間有人嗌「李生」，原來已經有人認得佢，結果全程身邊有個高級代表跟實，以為佢真係有心買樓。阿達話，佢其實只係想儲定啲舊樓書，日後都可以有個參考。


按照新例，發展商要喺新樓書刪除建築面積、只列實用面積，更改臨時買賣合約摘要，以至加入鳥瞰圖片等，有唔少規限，做少咗或會違規。