鍾樹根認未夠班食君悅

【明報專訊】前廉署專員湯顯明被揭發豪飲豪食，又請內地官員去君悅酒店食飯；喺湯顯明退休後、今年先至獲委任加入廉署貪污問題諮詢委員會嘅鍾樹根就話，佢做咗委員之後，只係獲現任專員白韞六邀請，成班委員喺廉署飯堂食過一餐便飯，大家互相認識，笑言自知未夠班去君悅食飯喎。


湯顯明事件近期炒得熱烘烘，樹根話，都想喺貪污問題諮詢委員會上傾點樣處理事件，檢討一下廉署規管制度。講到湯顯明成日請內地官員去酒店食飯飲茅台，樹根就話，間中請中聯辦官員食飯無問題，但湯顯明食得咁密，要搞私交，咁就應該自己畀錢先至啱。佢又話，食飯價錢上限好難定得太死，仲好謙咁話，「請國家元首食飯，一千蚊都唔嫌貴，請我就四百蚊都嫌多啦」。


新任委員廉署飯堂食一餐

佢又話，白韞六上任後，只喺1月時喺ICAC飯堂宴請新委員以及送別舊委員。樹根話，白專員做事較謹慎，席間無飲茅台。其實樹根有搞茅台酒代理嘅生意，佢仲講笑咁話，如果Emily想飲，大可以搵佢喎，唔使去廉署飲！