吳克儉唔認開會睇股票

【明報專訊】特首梁振英噚日去立法會出席答問大會，一眾司局長按慣例都現身支持特首，而社民連梁國雄（長毛）嘅助理咁啱坐喺公眾席，影到教育局長吳克儉喺議事堂內玩iPhone嘅相片，佢疑似用手機透過Bloomberg（彭博）應用程式查股價。呢張相隨即上載facebook，網民立即瘋傳。


答問大會後，Emily同一眾行家當然追住吳克儉問佢係咪睇股票啦，但佢就話「我唔係」，話自己通常開會前都會睇睇最新嘅新聞，同一啲特別嘅香港知識，但究竟睇咗乜嘢，佢就話唔記得咗喇。


影相時間3點33分

咁究竟係咪用Bloomberg App睇股票？吳克儉說「我都唔知，我睇咗好多唔同pages」，有記者拎出網上圖片問佢，係咪睇咗有關股票嘅資料，吳克儉就連續3次否認話「唔係呢個」，仲反問記者呢張相幾時影。記者答佢咪係你坐喺議事堂嘅時候影囉，但吳克儉就話自己早咗15分鐘到場，暗示佢唔係開會期間玩iPhone。但長毛助理翻查相機，就話影相時係3點33分，並非吳所講嘅15分鐘前喎！