發叔畀巨鴨勾起那些年

【明報專訊】雖然經民聯劉皇發已經77歲高齡，但原來佢仲好有童真，同好多港人一樣好關心嗰隻近日訪港嘅黃色巨鴨。前日仲話唔會出席答問大會嘅發叔，噚日起身問特首梁振英（CY），正當人人諗緊佢想問CY啲乜，佢竟然提起「巨鴨」。


有乜借鏡 考起CY

發叔話，近日訪港嘅巨鴨帶畀人無限歡樂，仲話勾起佢「那些年」嘅回憶。佢大讚巨鴨成本低，既瘋魔全城，又帶畀香港正能量，問CY覺得政府可以有咩借鏡喎。發叔問完呢條咁驚喜嘅問題後，引得哄堂大笑，CY都窒咗一窒，然後話日前策發會都有人分析過巨鴨呢單嘢，又話佢太太都受熱潮影響，特別搵番20年前陪過仔女冲涼嘅鴨仔喎。


其實經民聯林健鋒（Jeffrey）嘅爸爸林亮，正係港版膠鴨仔之父，噚日Jeffrey就帶咗一袋膠鴨仔派畀同事，其中民建聯李慧琼同發叔等人仲喺答問大會期間擺咗喺張枱上，話要發放正能量，同側邊貼滿示威標語嘅泛民形成強烈對比。