水果忍者推中國版力撼憤怒鳥

【明報專訊】憤怒鳥加上大紅燈籠，就可以變身做「中國版憤怒鳥」。如果水果忍者（Fruit Ninjj a）要變身「中國忍者」，又點打扮好呢？小琴聽講，水果忍者創作商Halfbrick，近排真係密密斟緊變身大計，想喺3個月內推出Fruit Ninj a中國特別版、吸引中國玩家眼球喔。


中國味更濃 唔想跑輸畀憤怒鳥

好多人覺得，水果忍者急急趕工想做個中國版出來，多數都係唔想跑輸畀憤怒鳥。講翻舊年，憤怒鳥年初就一早特登出咗龍年特別版，又趁住中秋節推出中秋特別版：真係難為班芬蘭佬細可以唸得咁周到，設計夾晒中國風，就算唔玩齋睇都覺得好冧。憤怒鳥贏到中國用戶歡心，個app嘅下載次數累計突破17億、竟然係水果忍者3倍有突，就唔算出奇啦。


十二生肖做背景 毛筆做「武器」

不過公平啲睇，水果忍者現時都已經有中國元素，譬如劈水果嗰陣可以揀中國十二生肖畫面做背景，仲可以用中國毛筆做「武器」（雖然小琴都唸唔明，毛筆點解可以用來斬水果），睇來Halfbrick自己仲係覺得中國味未夠濃啦。不過小琴心唸，水果全世界度度都有，如果隻遊戲淨係可以換刀、轉背景，睇怕就有啲悶啦。不如考慮做番隻「點心忍者」，掟啲餃子、燒賣同埋菠蘿包上天，畀大家揮刀過下癮啦。