教協搞腸癌檢查 張文幫襯

【明報專訊】唔講唔知，會員逾8萬嘅教協，會內榮譽會員（即年過60）嘅人數已逾萬，有見香港大腸癌發病率排行第二，而年過50嘅人患此癌症嘅風險較高，所以教協內務副會長張文光話，佢哋早前購置儀器，設立內窺鏡中心，鼓勵會員接受結腸內視鏡（大腸鏡）檢查，張文光同老婆分別「光顧」過呢項新服務，幸好兩人都無事！

張文光話，可以做到呢個服務，多得已退休嘅大腸專家李文豪醫生出山幫忙，內窺鏡中心今年2月成立以來已做過約百個檢查，結果發現有兩個個案屬早期癌症，可及早治療；約四成個案發現有瘜肉，喺檢查時會即時清除，並會化驗。


發現良性瘜肉已清除

若瘜肉係良性，好似張文光咁，3年後再檢查，若好似張太咁連瘜肉都無嘅，就可以10年後先再檢查喇。


檢查前要禁食同食瀉藥，排清大腸，正式檢查時，會以「清醒鎮靜」（conscious sedation）方式麻醉，呢個唔係全身麻醉，但會令人有睡意，結果張文光做檢查時真係瞓咗！張文光話，今年係教協40周年，設立內窺鏡中心係希望幫到會員防患未然，做一次檢查約5000幾蚊，有需要嘅會員同家屬可以報名。