希慎天台農圃 畀員工租戶申請

【明報專訊】新界鄉郊農地受發展威脅，面積萎縮，但亦有發展商花錢投資，喺鬧市中建造農圃，畀公司及租戶員工一嘗農耕樂，唔使搭車去新界，又能達到綠化天台同降溫等效果。


「都市農圃」位於銅鑼灣希慎廣場38樓，佔地5000平方呎，可以分割成大約90塊長方形小農田，每塊田大約35至40方呎，田與田之間預留通道，可以畀兩個人同時耕種。希慎係上個月推出「都市農圃」計劃，暫時只畀集團同廣場租戶嘅員工申請，Emily午飯時間去睇過，發現唔少員工利用1個鐘嘅食飯時間，學習耕種基本知識同技巧，又可即時實踐，落緊微雨亦繼續翻泥。希慎透露今年暑假會開放畀公眾參觀。


暑假開放公眾參觀

家唔少學校同商業大廈都有天台綠化，希慎廣場嘅農圃位於黃金地段，希慎興業建築設計及項目總監陳麗喬同Emily話無計過成本，佢又話耕種需要更厚泥土，對天台負重要求較綠化更高，公司喺設計階段已預留呢個天台，將原本設置喺天台嘅機房設施移至其他樓層，令呢幅農圃適合栽種有機農作物。