阿基拍片講巨鴨齋噏

【明報專訊】近日全城熱捧黃色巨鴨（Rubber Duck），唔少政治人物都把握機會講吓隻鴨仔有幾得意。Emily上個禮拜五見到民協YouTube頻道上載咗一段立法會議員馮檢基（阿基）講巨鴨嘅短片，睇嚟佢都諗緊食住個勢，將來講多啲生活熱話。


阿基喺片中提到細個都同過鴨仔玩，跟住就話西九呢排都有塑膠藝術展覽，諷刺比起政府搞嘅「家是香港」運動，更能夠吸引香港人目光。佢同Emily講，頻道一個禮拜上載一段片，搞咗4個月，今次諗住輕鬆談論時事，引起共鳴咁話。不過，唔知係咪因為成段片都係得佢一個人講嘢，點擊率至今都未過百，阿基話希望慢慢建立觀眾群，睇嚟佢都要學學膠鴨仔，努力吸引觀眾喇！