劉銳紹梁美芬疊聲駁火

【明報專訊】港台節目《城市論壇》噚日討論特首選舉，喺呢個問題上，民主派同建制派仍然似大纜都扯唔埋，噚日公民黨郭家麒同經民聯梁美芬等嘉賓，就新普選聯盟提出嘅7點共識爭拗，不過鬧得最面紅耳熱嘅，竟然係平日好溫文嘅時事評論員劉銳紹，佢喺節目中多次同梁美芬「疊聲」咁講嘢，要求對方做政改促成者而唔係阻力。


梁籲勿佔中 劉籲建制勿做阻力

梁美芬鬧佔中不利政改，仲叫劉銳紹幫手勸下有關人士唔好搞；劉銳紹就笑笑口咁話，咁對方應該先去做好促談工作，包括去信中央、促成全體議員返內地等。兩個人都唔肯相讓，多次疊聲爭拗，主持謝志峰都勸唔掂。


梁美芬話，一人一票選出提名委員會只係政治訴求，但《基本法》無承諾可以咁做，只係話可以普選產生特首，同時亦無話普選可以跟國際標準，仲呼籲泛民唔好將基本法「教條化」。智明研究所研究總監許楨就反駁，話即使真普聯共識有部分超出基本法基礎，但肯定唔係一人一票選提名委員會嘅建議超出基本法，如果基本法無講就唔做得，咁大家做緊嘅事，99%都唔符合法律。


劉銳紹就話，既然真普聯提咗具體方案原則，中央應用某種方式回應，又呼籲泛民唔應該將同中央秘密接觸視為不義。佢仲話有部分建制派有心促成政改，但亦有人係政改阻力。