陳智思：瞓8粒鐘可減肥

【明報專訊】Emily上個月寫咗篇稿，話行會成員陳智思（Bernard）日食6餐，減少運動量，竟然減咗5磅，呢篇文章喺網上收讀率都幾高。Emily前幾日又碰見Bernard，追問佢可否講具體啲減肥辦法，Bernard當然無托手踭，佢話減肥其實可以好輕鬆，專家話除咗控制飲食及運動量，仲要每日瞓8個鐘，兼飲大量嘅水排毒，可惜佢成日好忙，夜晚要工作，所以多數只瞓五六個鐘，未能享受瞓覺減肥！


Bernard一向fit 爆，近月採用新方法收身，減咗5磅，家維持156磅。佢話以往每日做個幾鐘運動，但長年累月咁搞，手腳關節勞損，所以要減運動量，但又怕因此變肥，所以先睇一啲專家教路嘅錄影學keep fit。佢話要減肥，重點係促進新陳代謝，令身體消耗熱量。


Bernard再談佢嘅飲食方法，話家約3個多小時就食一餐，每餐只填七成飽，唔食紅肉。佢話食乜其實關係唔大，但就唔可以食煎炸油膩食物，甜品就可免則免。佢話少食多餐，反而可以加快新陳代謝咁講。佢無食減肥藥，平時只會食少少維他命B雜。如果節食或一日只食一餐，反而會令大腦以為你唔夠飽，會吸收營養多咁講。


少咗運動 驚無力跑山

佢話減肥唔一定係辛苦拚命，每日半小時帶氧運動已足夠，仲話專家教路，每日瞓8小時、多飲水，等身體休息，都有助消脂喎。


身體減咗磅，又唔使咁辛苦做運動，Bernard應該開心先啱，但佢話有一個happy problem，因為運動量減少，怕體能下降，唔知第日參加跑山比賽仲夠唔夠力去拼。話時話，減肥係大事，Emily建議各位減肥前，應去問醫生或營養師，事關人人情况同體質唔一樣，絕對唔可以照抄。