水貨客摑記者判服務令

【明報專訊】兩位《南華早報》行家，年初喺上水站拍攝水貨客活動時，突然畀兩個男人襲擊。呢兩個男人噚日喺粉嶺裁判法院承認襲擊罪，被裁判官輕判社會服務令，佢哋得知結果喜上眉梢，笑住咁離開法庭。一名紅衣親友特別興奮，出咗法庭後開心到跳舞，邊跳邊大叫：「真係好爽，好爽呀，影我啦。」


官話行為侮辱但輕判

事發2月28日，《南早》記者謝美芳同曾愛盈喺上水站採訪，其間被告鄭成榮（51歲）同李克（51歲）突然衝前，先爆粗鬧兩名記者，鄭成榮仲郁手推兼掌摑記者，李克就用手篤記者嗰鼻。裁判官雖然話兩名被告行為具侮辱性兼且令人厭惡，但決定輕判佢哋分別100同60小時社會服務令，兼各自向記者賠償1000蚊。


被告嘅紅衣親友一行出法庭，先嚟一招「大鵬展翅」，高舉雙手話「我好鍾意影相，呢次真係好爽」。之後就化身「跳跳虎」，手舞足蹈咁喺行人路度跳跳紮，差啲撞到燈柱。跳跳吓，佢突然停低做「超人變身」動作，左手拉弓，右手舉高兼豎起拇指，然後chok咗一個食煙「甫士」，不停叫在場記者幫佢影相。


企喺一旁嘅被告鄭成榮笑住口咁話，「條傻佬真係無辦法」。後來紅衣男見記者唔睬佢，大叫一句「都唔好玩嘅」，然後用正常步速離開。