200蚊有拉菲？

【明報專訊】香港葡萄酒商會會長何耀康噚日去銅鑼灣沙嗲王食飯，發現餐廳正在推廣，只要食滿200蚊，就可以用200蚊換購一支法國2011年拉菲。不過，呢支拉菲唔係大家耳熟能詳嘅Chateau Lafite Rothschild，而係Chateau Lafitte，兩者嘅價錢差好遠，前者2011年要5000幾蚊。何耀康話，兩隻酒名稱只係差一隻字，但佢話已足以令一般市民有所誤會。


何耀康：足以令人誤會

何耀康大把識酒嘅朋友，好似Raymond喺網上查過呢支法國2011年拉菲，其實價錢大約114蚊，個網主要參考外國市場。佢質疑，即使入口計埋運輸成本，都唔可能貴成倍。咁點解沙嗲王換購都仲要畀200蚊呢？沙嗲王老闆鄭捷明同Emily講，佢早前去過德國，當地人已唔飲好貴嗰隻拉菲，而係飲佢入貨呢隻。佢係經德國超市，以14歐元（約141蚊）購入1000支，連同處理費5％及約2萬蚊運輸費等，賣200蚊唔係想賺錢，純粹係想回饋顧客咁話。


沙嗲王﹕德國人飲多

佢仲好豪氣咁講，若有客人話可以114蚊買到呢支拉菲，佢願意買入1萬支，再以100蚊賣畀大家。鄭生笑言﹕「我玩吓啫，蝕少少無所謂！」


不過，何耀康就話佢好唔滿意沙嗲王嘅宣傳，賣嘅係2011年酒，但下面就有一個牌，上面寫住法國2009年拉菲，北京市場現價4888蚊，令人有誤導之嫌咁話。鄭捷明話，唔知香港邊度可以買到呢支2011年拉菲，自己就喺網上搵到2009年拉菲嘅資料，所以先採用。