六四舞台今城大義演

【明報專訊】支聯會籌辦嘅臨時六四紀念館口碑唔錯，無論由上年嘅深水埗移師到今年嘅城市大學，依然人頭湧湧。不過，由於展館屬臨時性質，未能解決保安問題，搞到支聯會唔敢擺啲珍貴文物出嚟，暫時只能以相片形式展出。「六四舞台」亦為此出一分力，今晚會喺城大義演，所有門票收入全數撥捐六四紀念館。


8點開演 收入捐紀念館

「六四舞台」近年致力將六四事件呈現舞台，仲搞埋學校巡迴演出，希望令下一代認識事件之餘，亦畀大家用另一種手法悼念六四死難者。「六四舞台」今晚8點至9點半喺城大惠卿劇院，義演一場《在廣場放一朵小白花》，票價100蚊，學生同60歲以上長者、殘疾及領取綜援人士半價，收益全數撥捐建館用。據聞目前剩番幾十張門票，有興趣嘅話不妨去城大睇吓，仲可以順便睇埋六四紀念館