本土派拒赴六四集會 王丹心痛

【明報專訊】支聯會年復年舉行嘅六四燭光悼念晚會，20幾年來都得到數以十萬計港人支持，但今年就有一批以陳雲為首嘅本土主義者，話因為不滿支聯會今年「愛國愛民」嘅主題，話唔去六四集會，甚至話六四係中國嘅事，同香港無關。身處台灣嘅前學運領袖王丹噚日喺facebook話，對本土派嘅言論感到好心痛。


六四晚會彰顯港人良知

王丹話，每年維園嘅六四晚會，一定唔止係中國嘅事，而係彰顯港人嘅良知同堅持，同時亦展示港人對中共滲透嘅抗拒。佢話，紀念六四已超越六四本身意義，絕對唔係只對於某個族群或者國家嘅認同。


佢慨嘆話，每年維園點起嘅燈火，令全世界對香港多一份關心同尊重，同時亦鼓舞無數被迫害嘅人，唔明點解有人去到呢一刻要放棄，佢話，「親愛的香港朋友，請你們六月四日繼續來到維園吧，我想看到你們！」唔知本土派見到當年身受極權迫害嘅王丹講出呢番肺腑之言，又有乜回應？