詩姐呢頭批佔中 轉頭話唔識政治

【明報專訊】基本法委員會副主任梁愛詩噚日出席「愛心獎」記者會，佢將會擔任呢個活動嘅「終審委員會主席」，專責為活動選出得獎者。呢個活動係獎勵社會上熱心公益、默默行善，或者盡顯教育風範、含辛茹苦培育子女成材嘅人士，每名得獎者將可獲40萬獎金。詩姐噚日好積極推銷呢個活動，甚至電子傳媒問佢關於普選嘅問題，佢反而叫大家關心一下「愛心獎」選舉。


積極推銷「愛心獎」

活動結束後，電子傳媒喺門口等詩姐出嚟回應普選問題，但佢喺會場內已經接受文字傳媒訪問，或者唔想講兩次，到咗面對電子傳媒提問，立即耍手擰頭。縱橫政壇咁多年嘅詩姐，幾分鐘之前仲批評緊佔領中環行動，但出到去就話「唔識政治」，笑指記者「你哋個個都講得好過我」。


硬撼電子傳媒

有記者希望佢評論幾句普選，話香港好多人都關心選舉，但詩姐仍然唔開金口，反而拎起大會宣傳單張，呼籲傳媒「咁你哋快啲關心吓呢個（愛心獎）選舉啦」。有記者唔耐煩，問詩姐點解厚此薄彼，唔肯同電子傳媒講，詩姐就唔客氣咁話，「如果我一直都講落去，咁我成日就服侍你哋啦，咁我乜都唔使做啦」，隨即離開。