王丹不知陳雲是誰

【明報專訊】近日以文化人陳雲為主嘅香港本土派，因不滿支聯會今年「愛國愛民」嘅六四主題，發起罷去六四燭光晚會。呢個爭議繼續升溫，前學運領袖王丹前日喺網上開腔，佢話對本土派嘅講法好心痛。唔少網民噚日就將辯論戰場轉移到王丹facebook，而王丹就坦言唔認識陳雲，「完全沒聽說過這個人」。


本土派不滿「愛國」主題

自從王丹呼籲港人繼續去六四晚會後，佢嘅facebook變得異常熱鬧。有本土派人士話，去六四晚會，等於支持支聯會嘅「愛國」主題，決定唔去，話寧願留喺屋企悼念好過；有更加激進嘅人甚至話，香港嘅民主運動係為咗香港，而唔係為咗「王丹嘅中國」，更叫王丹「好自為之」，總之就火藥味甚濃。


有唔同意本土派嘅港人反駁，話每年去維園悼念六四，從來都唔係為咗支持邊個，而只係想話畀共產黨知，港人永遠都唔會忘記佢哋嘅罪行；亦有人認為，齊集維園、團結一致，先至係最有效嘅武器，質疑本土派叫人唔好去集會，如同共產黨喺度搞分化咁話。


王：鄰居沒自由 你不可能有

有香港網友向王丹「告狀」，話發起叫港人「忘記六四」、罷去集會嘅係陳雲，仲話陳雲曾話自己係「中國海外民運德國分部主席」。不過，王丹就話「完全沒聽說過這個人」、「完全沒聽說過海外民運有這麼一位德國支部主席」。


王丹又話，「鄰居沒有自由，你就不可能有真正的自由」，認為香港同中國嘅民主進程唇亡齒寒，希望香港人唔好因為要同大陸切割而放棄爭取平反六四。