陳勇批「佔領」係軍事術語

【明報專訊】港區人大代表、新界社團聯會理事長陳勇噚日出席知青藝術節新聞發布會時突然離題，叫「佔領中環」嘅人要跟知青前輩學嘢，補番啲中文。佢話因為「佔領」係軍事術語，即係宣戰咁解；講和平佔領，等於係講和平打劫，最後都係打劫，都係宣戰喎。


陳勇首先係讚揚現任領導人有知識青年上山下鄉嘅經歷，知民間疾苦，隨後佢話鋒一轉，話佔中嘅人脫離實際，冇同市民大眾一齊艱苦奮鬥嘅經歷，「法律專家叫人犯法」。佢話，香港冇經歷文革，發展得好好，「樣樣都試過，就是冇試過上山下鄉，冇試過批鬥運動，所以家有人想試吓」。佢話，呢啲係不可一不可再，「不希望國家經歷更多嘅苦難」。


會後，佢又講香港嘅核心價值係法治，「除非你搞革命，否則就要守法，要跟住契約精神，在法律框架下運動」。雖然《基本法》唔係個個都滿意，但都唔可以用違法手段去爭取，講拳頭，講muscle，「如果基本法都唔理，香港就會沉淪」。