百佳捐36噸賣剩食物

【明報專訊】環境局提出減廢藍圖，有超級市場過去9個月捐咗36噸多餘食物畀「惜食堂」，製作15萬個飯盒，免費送畀獨居老人同低收入人士。參加計劃嘅分店，今年底前會由30間增加到100間，仲會喺收銀處設捐款箱，呼籲市民捐錢畀「惜食堂」。


「惜食堂」受惠

百佳超級市場區域董事總經理（大中華區食品零售）簡力宏話，多數捐出賣唔晒或者包裝爛咗嘅食材，希望透過計劃幫到有需要嘅人。不過，佢點都唔肯講全線270間超市每日丟咗幾多廚餘，只喺重複話數量好少。


「惜食堂」行政總監陳妙瑜話，家每日製作2000幾個飯盒，相信百佳連同其他食肆加入計劃，可以令受助機構由40幾個增加到50幾個。不過，收到嘅食材多數喺新鮮蔬菜，需要額外買肉增加營養，平均每個飯盒成本10蚊。佢話，其實好多食肆都想捐出多餘食物，只係唔知有乜途徑，希望政府可以宣傳多啲，一來幫到人，二來可以達到減廢目標。