重案組call吳文遠

【明報專訊】「頭號梁粉」張震遠近日捲入商品交易所風暴，而商交所亦被警方商罪科搜查，原來，警方同時亦好關注另一位「阿遠」——社民連副主席吳文遠。吳文遠噚日同Emily講，中區警署噚日出動重案組打畀佢，要求佢協助調查，懷疑佢早前涉嫌喺法庭影相，觸犯《簡易治罪條例》228章第7條咁話。


指涉在法庭影相

話說早前碼頭工潮時，吳文遠個facebook曾經上載過一張第27法庭外嘅外貌相，被市民質疑佢違反法例，涉嫌喺法庭範圍影相。事隔個幾月，中區重案組阿sir終於搵文遠落口供，但文遠就冇理到佢。


根據《簡易治罪條例》，喺法庭影相最高罰款250蚊。吳文遠就話，呢單案根本係小事一樁，諗極都諗唔明，點解警方要大費周章出動重案組「厚待」自己，認為警方滑稽兼無稽。佢仲話，「此遠不同彼遠」，話警方與其嚴重浪費警力對待佢，不如花多啲人手調查張震遠好過喎。