廖長江：立會緊要過睇馬

【明報專訊】立法會商界議員廖長江（Martin）早前獲選為馬會董事。Martin係愛馬之人，不過佢就話對獲選馬會董事，接替剛退任嘅馬會董事李國棟「有啲意外」。跑馬地馬場星期三跑夜馬，Martin若果要立法會同馬場兩頭走，會唔會有啲困難？Martin就話，永遠會以立法會開會行先，最多只係喺立法會開會前，或喺夜晚去馬場睇幾場咁話。


除咗董事會，Martin亦參加董事會下面嘅4個委員會，佢話睇過4個委員會嘅開會時間，超過九成都無同立法會撞期，所以唔怕影響立法會嘅工作。提到立法會，Martin特登同Emily講，話喺立法會唔止喺會議廳，連喺立法會辦公室，都唔敢做同立法會無關嘅事。


對鏡頭講嘢唔自在

新一屆立法會議員上任過半年，Martin好似比較少對傳媒發言，其實大家都知Martin唔鍾意對鏡頭講嘢，佢就話唔係驚講錯嘢，只係對鏡頭唔係好自在咁話。有記者問佢，有無諗過報個課程改善應對鏡頭，Martin話都睇過，但afford（負擔）唔起喎，唔知呢啲課程有幾貴呢？