Ann姐疑似爆粗鬧佔中

【明報專訊】民建聯立法會議員蔣麗芸（Ann）向來語不驚人誓不休，噚日Emily去民建聯家庭事務委員會茶敘，Ann姐雖然無親生仔女，但佢就話以前年代啲父母養育仔女係天生天養，家社會變化，隨時父母喺facebook畀仔女unfriend（從朋友名單移除）。


講緊家庭忽轉話題

講講吓，佢失驚無神爆咗個疑似粗口單字，話家電視「黃金時間，×，淨係講佔中反中」，跟住又講番教仔經，似乎Ann姐不滿社會充斥佔領中環嘅新聞報道，忽視其他社會問題。Ann姐嘅豪邁，Emily真係估佢唔到。


鄭泳舜呻幼園學費貴

講開家庭問題，同場嘅深水埗區議員鄭泳舜（Vincent）就非常頭痕，佢身為3子之父，要幫囝囝搵學位，但係佢搵勻成個深水埗區，幼兒園學位都唔多，所以競爭好大。最後，Vincent搵咗一間每月學費3950蚊嘅幼兒園，仲要唔包冷氣、點心、校服書簿等雜費，夾埋每個月畀成4000幾，所以佢講明最好快啲有15年免費教育。


不過，Vincent父親係保良局主席鄭錦鐘，老婆胡可兒又係藝人胡杏兒家姐，呻窮就唔太有說服力喇！