阿涂仗義捐出議案 阿仁今提平反六四

【明報專訊】六四臨近，民主黨立法會議員何俊仁今日會提出一個無約束力嘅「毋忘六四事件，平反八九民運」議案。其實，今次可以校啱時間傾到呢個議案，真係有少少好彩，而佢嘅黨友涂謹申就更可以話係「無名英雄」，皆因阿涂抽到提議案嘅機會，然後「捐贈」畀阿仁，於是今年就有得喺立法會叫人毋忘六四喇。


立法會有70個議員，若果要提動議，就要排隊抽籤，據知阿涂好積極去爭位，今屆議會一開波就入紙，可惜抽咗6次都落空。按照議會規矩，阿涂喺第7次抽籤有優先權提議案，咁啱泛民要提六四議案，所以何俊仁就情商阿涂「捐」出議案，畀身為支聯會秘書嘅何俊仁提平反六四議案。


不過，何俊仁今次借議案，就似足劉備借荊州，一去無回頭，阿涂唔知今屆會期仲有冇機會可以提議案。


范國威著「血衣」上陣

講開六四議案，泛民相信今年都係一如以往咁遭到否決，但有議員仍諗方法出位，好似鍾意搞設計嘅新民主同盟范國威，佢整咗件「血衣」（圖），今日會著住出席會議，佢話咁樣係要迫使北京當局同議會內嘅建制派議員，要正視六四事件嘅血的教訓。