王光亞講「無方案B」

【明報專訊】民建聯立法會漁農界議員何俊賢見報率一向較低，唔係咁多人認識，但呢期就好威水，33歲就做到漁農界訪京團嘅團長，帶住一班叔父輩去北京拜會部委，噚日代表團去港澳辦，佢仲坐喺港澳辦主任王光亞身旁，大家都可以喺電視見到佢個樣。何俊賢就話今次帶團真係有少少壓力，但唔知係咪壓力大又緊張，佢竟然聽錯王光亞發言，當王光亞回應撤換特首傳聞、用普通話講「無方案B」（即不會換特首）時，讀過番書嘅何俊賢以為王主任講緊英文「Formula B」，好彩晚上Emily搵番佢求證，佢澄清自己聽錯咗！


漁農界訪京團噚日結束行程，連日拜會咗海洋局、農業部、商務部等官員，商討開放供港牛肉市場、拖網捕魚等問題，佢話內地部委對開放供港牛肉市場、衛生檢疫流程改善等都持開放態度，返嚟要搵港府官員跟進。


送廉價紀念品

本港社會近期關注官員酬酢外訪開支，代表團唔係官員，要自己付款外訪，但何俊賢都笑謂送禮好敏感，所以見到京官，都係送吓農會嘅刊物、領呔、會章等紀念品，佢話呢啲紀念品都係廉價貨，一定唔會超過官員食飯開支上限嘅450蚊㗎！