Ann促內會提罷免

【明報專訊】立法會議員黃毓民同陳偉業（大嚿）早前因為非法集結，分別被判囚6周緩刑14個月，以及判囚5周緩刑1年，建制派就表明會按《基本法》啟動解除議員職務機制。民建聯立法會議員蔣麗芸（Ann）噚日就去信內務委員會，要求由內會主席提出解除議員職務議案，不過泛民大部分都唔贊成，連自由黨等部分建制派都「說不」，似乎Ann今勻都只係做吓樣。


Ann話，若果動議喺內會被否決，黨團先至諗吓搵邊個議員提出，又話自己雖然唔多like毓民，但只係話要尊重《基本法》先去做，等大家討論，對事不對人喎。


毓民將開班培訓年輕人

呢邊廂，毓民就話「咪由佢哋傾吓囉」，唔驚被解除職務。大嚿就重申最好罷免到，咁樣可以變相「公投」。另外，毓民噚日與Emily同傳媒茶敘，佢話一直都想淡出人民力量，特首提名委員會等爭議只係加速佢離開，佢嚟緊會主力搞普羅政治學苑，今年9月會開班招募唔多過20名年輕人，培訓政治人才，仲不分黨派。