老婆冇書教 樹根賴教局

【明報專訊】立法會教育事務委員會噚日開會，正當一班議員對新高中學制檢討議論紛紛之際，民建聯鍾樹根突然自爆老婆失業，仲賴落教育局度，並向署理教育局長楊潤雄訴苦話要「靠你搵食」。樹根一開聲就炮轟教育局，話推新高中學制乜都「試吓試吓」，搞到喺中學教文學嘅老婆喺舊年失業，而佢自己就「不事生產」搞政治。


自稱不事生產搞政治

事緣新高中選修文學嘅學生愈嚟愈少，樹根話，簡直要校長求班學生先肯讀，老師教又辛苦，學生讀又辛苦，咪搞到老婆要「下崗」同香港教育無痛分手囉。樹根之後繼續娓娓道來，話時下咁多年輕人憎恨政府，兼且目無尊長，連愛國學校都有學民思潮成員，呢啲統統都要入教育局數，反而佢自己細時讀番書，都唔使國民教育，但愛國熱情不知幾咁高漲。


葉太轟「嘉琪公主」傲慢

除咗樹根，新民黨葉劉淑儀噚日都好有火氣，首先向公務員出身嘅楊潤雄「開刀」，話佢外行人做副局，分分鐘係做扯線公仔任人舞，跟手再炮轟教育局副秘書長陳嘉琪，話早年曾經向佢進諫，教育局應該將歷史列為必修科，點知畀人窒返轉頭﹕「你估個個好似你個女咁叻咩？」佢大鬧有「嘉琪公主」之稱嘅副秘「傲慢」，問佢係咪睇唔起香港學生咁話，搞到會議室一度火藥味濃。


話說立法會換屆以嚟，教育事務委員會氣氛不嬲幾平和，好似噚日咁多名句同針鋒相對，Emily都係第一次見。委員會之後仲有機會傾新高中，期望到時議員們有更多笑料爆。