黃定光：佔中有窒息性打擊

【明報專訊】建制派下個禮拜一（6月3日）會同特首梁振英（CY）去中環嘅香港會定期飯局，實行先「佔領中環」。飯局通常坐喺CY隔籬嘅民建聯主席譚耀宗話，唔係專登揀六四前一晚食飯，本來佢哋噚晚食，但因為今個禮拜會議議程多，費事開開吓會走咗去飯局啫。


譚sir同Emily講，今次CY請食飯，所以由CY決定時間地點。佢話喺香港會食西餐，大家可以坐埋同一張長枱，唔使好似之前去海都食中餐咁坐圓枱，今次約有廿幾人去。


呢排政府多醜聞，民建聯黃定光（象哥）同Emily講，佢會同CY講行會申報安排，話立法會同區議會議員都要「冲好涼」先至參選。象哥又話佔中對香港會有「窒息性打擊」，所以都會提喎。


何俊賢：王光亞有講Formula B

另外，漁農界前日喺北京拜訪港澳辦主任王光亞，提到撤換特首傳聞，民建聯何俊賢（高佬賢）話佢聽到王主任講「Formula B」，其後又話「方案B」。高佬賢噚日澄清話王主任兩個字都提過，好肯定無聽錯。咁究竟係「Formula」定普通話「方案」，今次真係「無頭公案」，唔知王主任會唔會澄清一下呢？