生態攝影大作亮相

【明報專訊】大家除咗喺電影、電視睇到探險家點樣喺野外求存，嚟緊3個月，仲可以去科學館欣賞攝影師鏡頭下嘅自然風光。科學館今日起展出由倫敦自然歷史博物館同英國廣播公司（BBC）舉辦嘅2012年度「野外生態攝影大賽」100幅得獎大作，呢啲相係由全球98個國家共4.8萬幅作品精挑細選出嚟，畀大家喺冷氣展覽廳入面感受原野氣息，亦提醒要關注環保。


科學館今展出

展覽總共有8個展區，踏遍海陸空，由瀕危物種、原野風貌，到都市間嘅自然景觀都一應俱全。部分展區仲會以幻燈片形式展出圖片，令畫面更逼真。展覽由今日起至9月1日喺科學館展出，毋須另外收費。科學館逢周四休館，逢周三免費入場，其他日子入場費每人25元，學生、殘疾人士及同長者半價。