昂坪360「64車廂」 澄清無生鏽

【明報專訊】前日有報道話昂坪360嘅纜車車頂同吊架都生鏽，昂坪360噚日立即安排工程人員向傳媒解畫，點知一單未澄清完，又有另一單要澄清。事關噚日撞正6月4日，出場示範嘅纜車又係「64」號，唔通佢哋都曲線悼六四？昂坪360發言人即時否認，話唔係特別咁揀，仲話同生鏽事件一樣，成件事係一場誤會。


講番纜車，昂坪360話車廂唔係生鏽，其實係吊架鋼纜潤滑油嘅油漬，混和空氣中嘅塵埃所致，仲即場喺車庫隨機安排兩架有少少咖啡色油漬嘅纜車，等工程人員示範用清潔劑抹走啲漬。


解釋車廂油漬非生鏽

昂坪360營運總管陳國偉話，纜車車身由鋁合金製造，鋼造吊架又噴咗防鏽物料，喺戶外唔會生鏽，滴落嚟嘅油係唔會影響纜車行車安全。


六四紀念日就連六合彩都有巧合，噚日攪珠咁啱係今年第64期，三獎有64注中，世事嘅嘢真係難料。