民陣賣佔中Tee 收益先用於七一

【明報專訊】六四24周年晚會，唔少政黨同團體乘機籌款，其實呢個情况支聯會都只能隻眼開隻眼閉，有啲識做啲嘅政黨，會將噚晚籌得嘅款項，捐出十分之一畀支聯會，但係咪個個都咁做呢？只有支聯會知道喇。


總收益一成畀支聯

最正嘅位係銅鑼灣記利佐治街入維園處，公民黨、新民主同盟、民陣、民間電台等早已擺到好位，公民黨出動星級大狀梁家傑、余若薇等嗌咪籌款，而新民主同盟及民陣更預先賣「佔領中環」嘅T恤同產品。民陣話，今年七一因為終點由政府總部移師到中環，所用嘅音響器材費用會貴過以前3倍，所以佢哋噚日賣嘅佔中T恤收益，會先留畀民陣用，但總收益十分之一仍會捐畀支聯會。


新同盟部分收益捐佔中

新民主同盟因為有「美術大師」范國威坐鎮，有佔中T恤同摺櫈賣，成員任啟邦話，截至7點左右，50張摺櫈差唔多賣晒，而100蚊一件嘅T恤仍然有售，至於最終收益，一成畀支聯會，約一兩成畀佔中運動。人民力量都有喺維園籌款，但仍售賣「拉布」，會唔會out咗啲呢？另外，佢哋出售嘅人力遮仍有早前已經退出人力嘅黃毓民個樣。