郭家麒紐約悼六四

【明報專訊】今年六四，公民黨郭家麒去咗美國辦理私務，缺席維園六四晚會及立法會會議。不過，郭醫生出發前都打聽咗喺美國有無悼念六四活動，所以去到紐約都專程出席當地悼念活動，仲見到前學運領袖吾爾開希、民運人士魏京生等人，大家仲一齊手持紙牌叫平反六四口號。


郭醫生仲喺紐約紀念六四嘅集會發言，佢話1992年時喺加州深造，當年嘅6月4日，佢都有喺三藩市中國領事館前為六四哀悼。