馬主抽籤 唐營當旺

【明報專訊】馬會公布第一輪中籤馬主名單，唐營真係當旺喎，唐英年、田北俊同林大輝齊齊中籤！前兩人抽中2014/15年度馬季買新馬，大輝就抽中2013/14年度嘅。田少好高興，佢話佢隻「風雲武士」早前退役，目前只餘「閃爍武士」一隻，今次及時抽到可以買自購馬，真係好彩。田少話近年啲馬一出賽都跑得好盡，所以唔係跑得好耐，預計「閃爍武士」都係跑多兩三年，今次佢可以買BB馬，好處係比出過賽嘅馬便宜，前者可能100萬一隻，後者因為已訓練兼贏過，價錢要300萬左右㗎。


至於林大輝呢，原來除咗佢個人，佢同太太再透過兩間公司都抽中，所以兩公婆合共可以買多3隻馬，大輝話佢鍾意買有往績嘅馬，雖然貴少少，都無所謂，家佢只剩下「太奇妙」，新買3隻馬相信都會屬於「奇妙系列」，佢話等下季買齊馬，便會重回高峰期同時有4隻馬喇，咁就有多啲藉口請朋友去馬場食飯兼睇賽事啦。