李立偉盼巨屎教人去M+

【明報專訊】人氣旺盛嘅Rubber Duck黃色巨鴨聽晚就要同大家say goodbye，以網民戲稱似「巨屎」嘅「複雜物堆」展品為首嘅西九巨型充氣展覽，亦都喺同一日曲終人散，想朝聖嘅市民，就要把握呢兩日機會盡快去睇。


巨屎明收爐 14萬人睇

西九管理局M+行政總裁李立偉噚日為個展覽總結，佢話接近個半月嘅展覽，錄得14萬人入場。佢覺得，喺地點唔算太方便之下，獲得本港以至全球媒體關注，可以有咁嘅成績相當滿意。佢希望藉今次展覽，可以等港人熟習點去呢個將來視覺藝術館M+落成嘅地方。


講起M+，李立偉透露，M+博物館大樓嘅設計，嚟緊會公布最終結果，喺早前入圍嘅6組建築設計團隊作品選出，其中有3組出自伊東豐雄等日本設計大師。李立偉仲講到，未來三四個月內，會招聘17、18個策展人，又預計2017年時M+開幕嗰陣，職員會由而家21人增加到400人咁話。