助理處長爭橋牌世界賽資格

【明報專訊】一連10日嘅第49屆亞太橋牌聯會錦標賽上周五開始，今年香港派出5隊參加，連政府新聞處助理處長林羅寶蓮（Pauline）同佢丈夫，都有份代表香港出戰女子組及長青組，同另外39隊來自世界各地嘅橋牌好手較量，贏咗嘅話有機會參加9月喺印尼舉行嘅世界錦標賽。


呢個錦標賽要打足10日，好費神，Pauline話打橋牌就好似做「偵探」，要絞盡腦汁估吓對方手上嘅牌，贏咗嘅話開心到「警察破案」一樣，非常滿足。佢話橋牌唔止要同對手鬥智鬥力，最緊要係同隊友嘅默契，一齊搵出最合適嘅出牌策略，所以即使拍檔雷惠芳成日唔喺香港，佢哋都會定時約埋喺網上練習，為比賽做足準備。


講番賽事，今日進入第四日，各組仍未分勝負，但Pauline老公有份參賽嘅長青組，至昨日為止喺15隊中位列第四，若餘下賽事保持狀態，都有機會贏到參加世界賽資格。至於該組排第二嘅泰國隊伍，成員包括行會成員陳智思喺泰國嘅家族成員。