CY阿爸愛茅台款客

【明報專訊】前廉政專員湯顯明鍾意飲茅台眾所周知，原來特首梁振英（CY）爸爸一樣喜歡用茅台款客，但就曾畀細個時嘅CY心急打爛。話說父親節將至，身為3個仔女爸爸嘅CY早排接受電台訪問，分享同父親嘅相處趣事，乘機軟銷形象。佢話自己讀緊小五、小六時，屋企都要「穿膠花」搵食，父母經常叫佢落街買嘢，有次阿爸喺屋企請客，叫佢落街買茅台送菜，點知小小CY太心急跑上樓，一個唔覺意打爛茅台。


CY話當時好驚，點知阿爸唔單止無鬧佢，仲叫佢下次小心啲，搞到佢自己唔好意思，識得自我反省咁話；去到家為人父母，佢都會記住呢段往事，唔應酬都要陪仔女成長、同佢哋做friend，怕仔女愈鬧愈反叛喎。CY仲自爆曾經賣甩老婆同囡囡，同阿仔去「父子遊」促進感情，不過佢建議爸爸們咁做之前記得徵求太太同意，唔係就後患無窮。