議員下河特訓扒浴缸

【明報專訊】噚日好多人去尖沙嘴送別巨鴨，而民建聯陳恒鑌同民主黨單仲偕就去咗沙田城門河扒浴缸，原來佢哋係為月底舉行嘅香港龍舟嘉年華「名人扒浴缸大賽」積極備戰，準備到時大顯身手。


陳恒鑌同單仲偕一朝早到石門訓練中心，聽教練講解咗半個鐘，終於可以「處男下河」，坐上玻璃纖維浴缸，幾經辛苦先平衡到，好彩上天對佢哋唔錯，中途無落大雨。


不過噚日只係試水日，想睇海洋公園主席盛智文、迪士尼樂園行政總裁金民豪、昂坪360董事總經理邵信明，同其餘兩名立法會議員謝偉俊、張華峯激鬥，就要喺今個月6月23號下晝1點到2點，去尖東對開維港，睇佢哋鬥快划行100米衝線喇。