奶茶倡候選非物質文化遺產

【明報專訊】香滑奶茶係唔少港人至愛，民政事務局長曾德成噚日寫網誌，公布非物質文化遺產諮詢委員會已經按照科大華南研究中心普查結果，建議將包括奶茶在內嘅477個項目，列入非物質文化遺產嘅擬定清單。曾局長話中心普查咗791個項目，唔少係由公眾申報，Emily知道提出申報奶茶嘅，就係專做咖啡茶葉生意嘅金百加集團主席黃家和（Simon）喇！


Simon話家族早喺1930年代開始做咖啡茶葉生意，佢早排仲創立香港咖啡紅茶協會，家每年同貿發局合辦「金茶王」比賽，同奶茶可謂甚有淵源。佢同Emily講，香港人每日平均飲230萬杯奶茶，數量多到不得了，加上港式奶茶係用茶壺、布包來回翻冲，飲落別有風味，成為獨有飲食文化傳統。噚晚身在加拿大嘅Simon一知道奶茶入圍清單，不知幾咁興奮。


大牌檔茶餐廳唔適合

除咗奶茶，有人亦建議將大牌檔、茶餐廳列為非物質文化遺產，曾德成就喺網誌話，兩者只係經營食品生意嘅運作方式，唔係咁適合；相反奶茶係一種製作技藝，亦係世代相傳嘅知識，所以獲揀選。