葛輝愛爾蘭搵到筍工

【明報專訊】前政府資訊科技總監葛輝（Jeremy Godfrey）前年公開指控政府批合約畀iProA做上網學習支援計劃，係有政治目的，最終政府喺今年以違約為由踢走咗iProA，證明葛輝當年嘅質疑都有幾分道理。當年被政府鬧爆嘅葛輝靜咗一排，最近守得雲開見月明，前日獲愛爾蘭政府委任佢做「the Commission for Communications Regulation」嘅專員，月薪有13萬港元，算係筍工。


祖籍英國嘅葛輝喺資訊科技界打滾30年，因為上網學習支援計劃事件，冇得續約政府資訊科技總監，唯有做住顧問工作，今次應徵新工，走出香港向外謀發展。


月薪少香港5萬

佢返新工嘅委員會係專門規管愛爾蘭嘅電子通訊行業，包括電話、電台頻譜都管埋，有啲似香港嘅通訊事務局。雖然個權大過以前喺港府嘅工作，但人工似乎就差啲，以前做政府資訊科技總監，月薪逾18萬港元，新工月薪為13萬，果然喺香港做官，人工係超過國際水平。