內地私銀服務 教女客戶防小三

【明報專訊】內地有錢人愈來愈多，對於私人銀行服務需求亦都愈來愈大。對於各大銀行講，過去只要為呢尊貴客戶提供舒適地方，有專人侍候，多一杯藍山靚咖啡，可能已經足夠，但競爭日漸激烈之下，家呢服務只不過係基本要求。

做埋管家 向有錢人私人生活入手

最近就有內地記者響武漢做個調查，發現家私人銀行直頭要做埋管家咁滯。好似民生銀行（1988）、中信銀行（0998）及建設銀行（0939）咁，佢私人銀行已經唔單止用招呼客戶，仲有高爾夫室、KTV、健身室等等。有直頭向班有錢人私人生活入手，例如專門提供「防小三（情婦）」培訓畀女客戶，保障佢婚姻生活，亦有銀行瞄準客戶下一代，中信銀行就有為客戶3歲以下仔女安排「啟蒙音樂」、「啟蒙國學」課程；18歲以上就有理財培訓；仲有銀行更誇張，直頭幫客戶仔女搞埋相睇。