葉劉怕同卿姐撞衫

【明報專訊】立法會嘅女議員對衣著都算好講究，好似噚日喺立法會內，民主黨主席劉慧卿同新民黨主席葉劉淑儀，不約而同著咗紅色外套。女士都幾介意「撞衫」，葉太下周二將接受卿姐網站節目訪問，佢好關注究竟當日卿姐著咩衫，以免錄影時出現撞衫。


一星期前問卿姐衣著

卿姐噚日錄影佢主持嘅網台節目《議會內外》前，突然望住個電話笑到停唔到，佢話收到信息話下星期約咗葉太錄影呢個節目，點知葉太就問佢當日會著咩色衫，等大家唔使撞衫咁話。卿姐話佢唔會諗定下星期著乜衫，費事應承咗人，自己又唔記得就無謂，所以不如錄影前一日先至再講，又或者葉太講定想著咩衫，等佢去避仲好。


查實葉太同人撞衫都唔係第一次，上屆立法會期，佢就同時任運輸及房屋局長鄭汝樺著同款套裝現身議會。