朱牧上舞台演佔中

【明報專訊】劇團「六四舞台」早前喺多間中學巡迴演出，將八九民運嘅「黃雀行動」搬上舞台。雖然學校巡迴演出已經告一段落，但唔代表佢哋有得唞，事關六四舞台下月盛大演出《黃雀飛（佔領中環版）》，除咗佔中搞手朱耀明牧師粉墨登台，佢嘅佔中拍檔戴耀廷同陳健民亦會出席劇後嘅研討會。


韓連山飾演中學教師

《黃雀飛（佔領中環版）》，一聽劇名就知故事由六四事件貫穿現代佔中。朱牧去年為《讓黃雀飛》演出時，已經試過「飾演」20幾年前嘅自己，今年除咗呢個角色，仲會做埋佔中發起人一角。另外，曾喺反國教科運動絕食嘅教協理事韓連山，亦會登場飾演女主角嘅中學教師。


戴耀廷陳健民出席討論會

朱牧上年未參與籌劃佔中，排練時間自然多，今年佢要兼顧佔中呢個火熱議題又點算呢？話劇監製張家弘透露，佢哋理解朱牧分身不暇，所以會將朱牧嘅戲份集中幾日排練，佢哋亦透過朱牧成功約到佔中另外兩子戴耀廷同陳健民，分別喺兩日出席劇後研究會，同觀眾討論當今香港爭取民主嘅情况。


話劇7月26至28日喺牛池灣文娛中心劇院公演5場，門票分為210元同160元兩種，全日制學生、長者同殘疾人士有半價優惠，有興趣嘅朋友可以喺城市電腦售票網買飛。