少時遇溺 大個做水警指揮官

【明報專訊】唔少警察都有自己為何做警察嘅故事，有人可能係受電視劇影響，有人可能因為年幼嘅個人經歷。Emily早前去水警有關「海上遊樂安全分享會」記者會，水警東指揮官吳偉明同記者傾偈，話佢好明白水上安全嘅重要，仲講咗佢細個遇溺嘅舊事。


吳sir話，家仲記得讀小五嘅時候，參加學校旅行去水塘。當年啱啱學曉游水嘅佢，自然唔放過跳落水塘游水嘅機會。吳sir話，嗰時游游吓發覺唔對路，原來已經游到掂唔到地，仲飲咗好多啖水，成個人即刻沉落水，得番隻手喺水面係咁揮手求救。好彩當時有個高佢一兩年級嘅大哥哥見到，好有氣有力咁將佢拉番上嚟，呢個經歷至今仲好深刻。


吳sir見上年該區接獲水上活動意外報警個案增加37％至92宗，當中有4宗係遊船河市民「海上吸毒」，今年起推動「海上抗毒約章」計劃，簽約章嘅船家同意張貼約章證書，畀水警輪靠泊遊艇，視察打擊海上濫藥，有七成嘅西貢區遊船都參與咗呢個計劃。