周一嶽：做平機會斷六親

【明報專訊】平機會主席周一嶽上任兩個幾月，噚日第一次上立法會簡介平機會工作，佢以前做食物及衛生局長去議會不時被議員批評，但噚日成班議員都對佢好客氣，歡迎佢之餘仲擔心平機會唔夠錢使。上任主席林煥光入行政會議而選擇離開平機會，有議員關注周一嶽會唔會蕭規曹隨考慮入行會呢？周一嶽就話，無意再擔任其他崗位嘅工作喇。


已辭殘奧委會工作

周一嶽話，平機會工作令佢「斷六親」，無意考慮其他崗位，盡力做好平機會呢3年任期。佢話，為咗專注平機會工作，甚至連做咗30年嘅殘疾人奧委會工作都已經辭任。


考慮架構重組請CEO

換咗個身分重返議會，周一嶽最大感受係立法會有好多新面孔，連佢都話識唔晒啲議員。至於平機會工作，佢透露未來半年都會諗吓係咪做內部架構重組，亦有高層同事將於一年內退休，所以佢都會檢討係咪重新招聘行政總裁呢個職位，等主席做好對外工作，行政總裁主力內部事務，但就強調自己都有時間兼顧好內外工作咁話。


至於架構重組，周一嶽話家平機會有5方面嘅工作範圍，包括培訓、處理投訴等，喺改革時都會考慮係咪可以將工作互相分擔，例如處理投訴嘅同事壓力都好大，搵人幫佢之餘，亦可以搵佢幫手培訓人才。