鄉議局賣樓定買樓？

【明報專訊】噚日鄉議局開大會，鄉議局嘅「本局出售九龍塘局址九人專責小組」，匯報鄉議局早前以1.78億賣咗九龍塘金巴倫道嘅舊會址。但喺會議議程上，文件就咁寫：「鄉議局法團在本年6月6日已經與以1.78億港元購買九龍塘金巴倫道47號局址物業的買家『俊昇國際有限公司』簽署了該物業正式買賣合約」，惹來文件寫錯嘢疑雲。


查實呢句如果畀啲耐性睇，本身都無乜問題，因為係講緊「購買」九龍塘局址嘅「買家」，但錦田鄉委會主席鄧賀年就問「發叔」劉皇發，點解唔係用「出售」一詞。發叔睇完之後，覺得容易惹人誤會，於是就要求秘書處「搞清楚寫法」再更正。


大浪西擬納郊野公園 促當局重新諮詢

至於政府早前刊憲，將大浪西灣約16公頃土地納入西貢東郊野公園範圍，鄉議局噚日亦用咗個多小時閉門傾，發叔會後促請當局重新諮詢同賠償，否則不排除發起遊行抗議咁話。佢話鄉議局決定周四舉行申訴大會，讓受影響村民表達意見，不過，據了解暫時就未有官到。