牧師：不應迴避佔中

【明報專訊】早排有宗教界牧師就應否參加「佔領中環」觸發爭論，屬於開明派嘅中大祟基學院神學院副教授龔立人有一番妙論，佢話從神學角度，所有喺香港發生嘅事都同教會有關，所以教會不能、亦不應迴避「佔中」一事咁話。佢形容，佔中係一場「覺醒運動」，佢亦不忘藉佔中宣教，話「有心的人就去做（佔中），但不是成功佔中就能救香港，因救香港的唯有上主」。


順道宣教：唯有上主可救港

基督教網站《時代論壇》近日刊出龔立人以神學角度談佔中嘅講座內容，佢話公民抗命源自「良知、對不公義法例的不容忍和對非暴力的堅持」嘅行動，所以，其實唔需要《聖經》支持，需要討論嘅應該係教會嘅角色。


有教會強烈反對佔中，但龔話上帝差遣教會到地上，係要關心社會嘅事，唔使迴避佔中，佢自己就唔會盲目追求和諧，亦唔應該陷於陰謀論，把各方歸邊分類，認為教會應該建立對話咁講。


基督教循道衛理聯合教會會長袁天佑牧師回應龔立人，話教會唔係自己嘅物業，而係神託畀教徒嘅地方，所以好應該幫助鄰舍，應大方一啲，覺得可考慮借地方予佔中參與者使用。