田二少助N無學英文

【明報專訊】曾經喺《窮富翁大作戰》掃街同住籠屋嘅新民黨副主席田北辰（田二少），最近伙拍英語教材公司搞咗個「田叔叔英語學習計劃」，由佢做教材產品代言人，將7800萬元嘅代言費用晒買教材，目標係捐助1000個弱勢家庭子女免費學英文。


捐代言費買教材送小朋友

田二少話，「N無人士」係社會上最少支援嘅一群，要幫到佢哋，除咗經濟援助，更重要係提供優質教育，希望佢哋嘅子女可以透過教育，尤其係學好英文，以知識改變命運，從此脫離貧窮循環咁話。


呢個學好英文計劃，目標係3年間免費為1000個合資格家庭嘅4至12歲細路仔提供自學教材，仲配置專用點讀筆同配音講解，導師每3個月跟進一次進度。申請人家庭平均月入低過1.2萬元，家長自身英語水平不足，預計下個月會向首批通過審批嘅家庭派發教材。