劉嘉鴻辭人力主席

【明報專訊】人民力量早前內訌，立法會議員黃毓民退黨，對佢哋都幾震撼。事隔唔係好耐，劉嘉鴻話要辭去人民力量主席。劉嘉鴻噚日同Emily講，佢已經喺周二晚嘅執委會請辭主席，但當晚議題擱置，佢將會留任至下次執委會，選出新主席為止。


劉嘉鴻話自己去意已決，原因係覺得黃毓民退黨因佢而起，雖然佢至今都唔認同黃毓民對佢嘅指控，但認為自己作為主席，無維繫好3名議員，所以佢要負上責任咁話。


不過，劉嘉鴻話自己唔係心灰意冷，雖然辭去主席，但佢都仲繼續係人力執委。至於七一遊行，佢哋仍然會重點搞，包括照舊喺修頓外擺大型街站，至於其他部署就會下周討論。至於會唔會去添馬公園踩建制派場，劉嘉鴻就話始終七一遊行人數最重要，未有打算去踩場，但亦唔排除計劃有變。


劉嘉鴻話，會呼籲人力支持者參與「民主倒梁力量」喺七一後嘅絕食50小時運動，立法會議員陳偉業噚日就喺facebook透露，20幾年前曾就政改問題絕食抗議嘅馮智活牧師，會參加今次絕食。