七一獲授勳？ 淘大「村長」：希望有

【明報專訊】特首梁振英（CY）話咁快就做咗一年，亦係差唔多公布授勳名單嘅時間。話說民主黨噚日召開記者會，話CY施政與政綱不符，涂謹申就透露，有建制派同佢講，今年授勳名單有好多「梁粉」，聽到都令人擰晒頭，但係佢唔知真正涉及嘅人數，同埋有乜人獲授勳。


Emily就聽聞SARS重災區淘大花園，業主委員會聯會主席葉興國（村長）獲頒太平紳士，佢上年曾經喺CY競選特首時幫佢站台。葉興國噚日話政府到家都未同佢透露，佢就坦言希望有喎。


另外，鄉議局當然執行委員、元朗區體育會永遠會長黃松泉就會獲頒銀紫荊星章，佢上年接待過以「私人活動」名義到訪天水圍嘅CY，不過Emily噚日搵唔到佢回應。


黃松泉或獲銀紫荊星章

已有銀紫荊星章嘅CY競選辦副主任劉炳章、身為太平紳士嘅兒科醫生李家仁都話，未有任何授勳消息。


授勳評審委員會委員高靜芝同Emily講，現階段唔可以透露有乜人選，不過就叫大家拭目以待，又話授勳制度係論功行賞。